مرثية الشاعر جابر هايف

دخيلــــــك قول أي حاجه بلا كل عام وانت بخير

أنــا من وين اشوف الخير وجرحي تشتعل ناره ..؟

بلا خير وبلا عيد وبلا فرحـــه ولا تقديـــر

عليك الله ياعيدٍ تعــــود وميته ساره

على وضعك ياعيد من الحناجـــر تطلق التكبير

وثوبـــك ياصباح العيد كل الناس تختاره ....,

وطفلٍ لملم أغراضــه ونام بفرحته بكيـــر

وقام من الفجر يلبس ويســـأل وين ديناره ...؟

وطفلـــه قامت تمشط شعرها من أخوها تغيـــر

تبي تغيضـــه بشنطتها الجديده وعقد وسواره ..,

وبنتٍ حنت إيديــها برســـمٍ للعيون يثير

وحطت كحــل وحطت عطر وزاد العيد بأزهــاره ...!

ورجلٍ يفتح أبــوابه على عز وبلا تقصيــــر

وصوت النجر وحمس البن وريح الهيـــــل في داره ...,

وجمـــر ( ن) يحتضن صفــر الدلال ويعشق التبخيـــر

وهرج ( ن) طيب وفلــة حجاج وضحك وبشــاره ...,

وفرحـــة أم تبكي من فرحــها خانها التعبيـــر

وحارت وش تبي تاخذ هديــة عيد للجـــاره ...؟

وكل الناس تفرح في صبـــاحك والامور تصيــر

وترســم للسمـا شكل الفرح في مبسم الحــاره ...,

كذا وضعك ياصبـــح العيد ولكن في عيوني غيـــر

تذكرني بموت وقبر ورمل وطين وحفــــاره ...,

تذكرني بــ ساره ياصبــاح الجرح والتذكـــير

تذكرني بدم الفجر وموت الصبـــح وأنـــواره ...!

خذتها من سنيـــن يدينك بقســــوه بلا تأخيـــر

وماتت في كفوفـــك ياصباح الموت وأحضاره ...,

وهي كانت تجهز ثوب عيد وتعطره تعطيـــر

ولكن الكفن عيـــا وشمس العيد غداره ...!

عليك الله ياعيـــدٍ ذبحت القلب والتفكيـــــر

وشلت بداخلي جرحٍ ينوح وانت مزماره ...,

ثلاث سنين وصبح العيد ثوبي مشقق( ن) وقصيـــر

وكفي تمـــلأ جيوبي برمل القبــر وحجاره ...,

ثلاث سنين اجي للقبر مره صبح ومره عصير

وأضمــه وأمسحــه وأبكي عليه وأنشق غباره ..,

ثلاث سنين وباقي العمر لاطيب ولاني بخـــير

مدام القبر ودود الارض عيٌد في جسد ســــــــاره ...........!!!

مرثية الشاعر جابر هايف, جابر هايف, شعر, شعراء جابر هايف, قصايد جابر هايف, قصايد شعر, مرح جابر هايف, مرح شعر, مغامرات جابر هايف,  مغامرات شعر ,